LIC Shares Update: एलआयसीची सुमार कामगिरी; गुंतवणूकदारांना कोट्यवधींचा फटका, तज्ज्ञ काय म्हणतात?
एलआयसीच्या शेअर्सची सुमार कामगिरी सुरूच आहे. आतापर्यंत या शेअर्समधून गुंतवणूकदारांचे कोट्यवधी रुपयांचे नुकसान झाले आहे. चांगला परतावा मिळेल या अपेक्षेने अनेकांनी शेअर्समध्ये गुंतवणूक केली होती.
मुंबई : एलआयसीच्या शेअर्सची (LIC Shares) सुमार कामगिरी सुरूच आहे. गेल्या आठवड्यात एलआयसीच्या (LIC) शेअर्समध्ये मोठी पडझड पहायला मिळाली. विमाधारक आणि एलआयसी कर्मचाऱ्यांना शेअर्स खरेदीमध्ये काही प्रमाणात सूट देण्यात आली होती. त्यामुळे त्यांनी या शेअर्समध्ये मोठी गुंतवणूक (Investment) केली. मात्र पहिल्याच दिवशी हा शेअर 867 रुपयांना सूचिबद्ध झाल्याने गुंतवणूकदारांना पहिला फटका बसला आहे. या शेअर्सची इश्यू प्राईस 949 रुपेय निश्चित करण्यात आली. परंतु पहिल्याच दिवशी या शेअर्समध्ये आठ टक्क्यांची घसरण झाली. त्यामुळे गुंतवणूकदारांमध्ये गोंधळाचे वातावरण निर्माण झाले. मोठा गाजावाजा करत शेअर बाजारात उतरलेल्या भारतीय आयुर्विमा महामंडाळाच्या या शेअर्सने गुंतवणूकदारांना तगडा झटका दिला. एलआयसीच्या शेअर्समध्ये पैसे गुंतवलेल्या गुंतवणूकदारांचे गेल्या आठवडाभरात तब्बल 77 हजार 600 कोटी रुपयांचे नुकसान झाले.
घसरण सुरूच
एलआयसीचा शेअर बाजारात सूचीबद्ध झाल्यापासून सातत्याने या शेअरमध्ये घसरण सुरूच आहे. त्यामुळे गुंतवणूकदारांची मोठी निराशा झाली आहे. हा प्रश्न केवळ एकट्या एलआयसीचा नाही तर सध्या संपूर्ण शेअर मार्केटमध्येच मोठी पडझड दिसून येत आहे. शुक्रवारी शेअर बाजारात तेजी दिसून येत होती. मात्र या तेजीत देखील एलआयसीचा शेअर्स स्थिर होता. आठवड्याच्या शेवटच्या दिवशी एलआयसीचा शेअर्स 826.05 अकांवर स्थिरावला म्हणजे इश्यू प्राईसच्या तुलनेत सध्या या शेअरमध्ये मोठी घसरण दिसून येत आहे.
पाचवे स्थान गमावले
भारतातील सर्वात मोठी विमा कंपनी म्हणून ओळख असलेली एलआयसी ही मार्केट कॅपमधील देशातील पाचव्या क्रमांकाची सर्वात मोठी कंपनी होती. मात्र शेअर बाजारात सुरू असलेल्या पडझडीमुळे एलआयसीला तब्बल 77,639.06 कोटी रुपयांचा फटका बसल्याने एलआयसीने आपले पाचवे स्थान देखील गमावले आहे.
गुंतवणूकदारांनी काय करावे?
एलआयसीच्या शेअर्समधून मोठा परतावा मिळू शकतो, या अशेने अनेकांनी एलआयसीच्या शेअर्समध्ये पैसे गुंतवले होते. मात्र सध्या तरी त्यांच्या पदरी निराशाच येताना दिसून येत आहे. सध्या एलआयसीच्या शेअर्समध्ये पडझड सुरू आहे. ही पडझड आणखी काही दिवस कायम राहू शकते. एलआयसीमध्ये लॉंगटर्म जे गुंतवणूक करतील त्यांचा फायदा होण्याची शक्यता असल्याचा अंदाज तज्ज्ञांनी वर्तवला आहे. तसेच ज्यांना लॉंगटाईम गुंतवणूक करणे शक्य नाही त्यांनी एलआयसीमधील आपली गुंतवणूक कमी करावी असा सल्ला देखील या क्षेत्रातील तज्ज्ञाकडून देण्यात येत आहे.
