लोकसभा निवडणूक रॅली तपशील 2024

जे.पी.नड्डा हे हिमाचल प्रदेशातून राज्यसभा खासदार आहेत. 2014 मध्ये भाजप सरकार सत्तेत आल्यानंतर जे.पी.नड्डा यांना आरोग्यमंत्रिपदाची जबाबदारी देण्यात आली होती. नड्डा यांचा जन्म आणि शिक्षण पाटणा येथे झालं आहे. त्यानंतर ते हिमाचल प्रदेशात स्थायिक झाले. हिमाचल प्रदेशातील विद्यापीठातून त्यांनी एलएलबीची पदवी घेतली. नड्डा यांनी जम्मू-काश्मीर, पंजाब, हरियाणा, छत्तीसगड, तेलंगाणा, केरळ, राजस्थान, महाराष्ट्र, उत्तर प्रदेश यांसह अनेक राज्याच्या प्रदेशाध्यक्षपदी काम केले आहे. भाजपच्या संसदीय बोर्डाचे सदस्य म्हणूनही काम पाहिले आहे. भाजपच्या केंद्रीय निवडणूक कमिटीचेही सदस्य म्हणून त्यांनी काम केले आहे. 2019 च्या लोकसभा निवडणुकांमध्ये नड्डा यांच्यावर उत्तर प्रदेशाची जबाबदारी दिली होती. त्यावेळी गुजरातचे भाजप नेते गोवर्धन झडपिया यांच्यासोबत नड्डा यांनी चांगली कामगिरी केली. यामुळे उत्तरप्रदेशात पक्षाला 50 टक्के मतं आणि 64 जागा मिळाल्या होत्या.

अमित शाह यांचा जन्म मुंबईत 22 ऑक्टोबर 1964 मध्ये झाला. वयाच्या 16 व्या वर्षापर्यंत गुजरातमधील मानसा या गावी त्यांचं प्राथमिक शिक्षण झालं. त्यानंतर त्यांचं कुटुंब अहमदाबादमध्ये स्थायिक झालं. अमित शाह यांच्यावर त्यांच्या आईचा प्रचंड प्रभाव होता. त्यांची आई गांधीवादी होत्या. आईकडूनच त्यांना खादी परिधान करण्याची प्रेरणा मिळाली. 1977 मध्ये मेहसाणआ लोकसभा निवडणुकीत जनसंघाच्या तिकीटावर सरदार वल्लभभाई पटेल यांची कन्या मणिबेन पटेल उभ्या होत्या. त्यावेळी शाह यांचं वय अवघं 13 वर्षाचं होतं. या वयात त्यांनी मणिबेन पटेल यांचा प्रचार केला होता. 

80च्या दशकातच अमित शाह राष्ट्रीय स्वयंसेवक संघाशी जोडले गेले. त्यानंतर अखिल भारतीय विद्यार्थी परिषदेत सामील झाले. नंतर भाजपच्या युवा मोर्चात त्यांनी काम सुरू केलं. लालकृष्ण आडवाणी यांच्या गांधीनगर लोकसभा मतदारसंघातील जबाबदारी अमित शाह यांच्याकडेच असायची. 1997 मध्ये अमित शाह हे भाजपच्या युवा मोर्चाचे राष्ट्रीय कोषाध्यक्ष झाले. त्याच वर्षी गुजरातच्या सरखेज विधानसभा मतदारसंघातील पोटनिवडणुकीत अमित शाह उभे राहिले आणि विजयी झाले. इथून त्यांचा संसदीय राजकारणाचा प्रवास सुरू झाला. त्यानंतर ते सातत्याने विधानसभेवर निवडून आले. 2010 पर्यंत ते गुजरातच्या विधानसभेत होते. त्यानंतर त्यांचा राष्ट्रीय राजकारणात प्रवेश झाला. भाजपचे राष्ट्रीय अध्यक्षपदही त्यांच्याकडे आले. सध्या ते केंद्रीय गृहमंत्री आणि सहकार मंत्री आहेत. भाजपचे चाणक्य म्हणूनही त्यांची ओळख आहे. 
 

नितीन गडकरी हे भाजपचे ज्येष्ठ नेते आहेत. केंद्रीय परिवहन मंत्री आहेत. गडकरी हे मूळचे नागपूरचे. त्यांचा जन्मही नागपूरचाच. एम कॉम, एलएलबीपर्यंत त्यांचं शिक्षण झालंय. गडकरी यांना तीन मुलं आहेत. विद्यार्थी दशेपासूनच गडकरी हे विद्यार्थी संघटनेशी जोडले गेले. 1995मध्ये शिवसेना-भाजपच्या युती सरकारमध्ये गडकरी यांच्याकडे सार्वजनिक बांधकाम मंत्रीपदाची जबाबदारी आली होती. मंत्री असताना त्यांनी राज्यातील पूल बांधणीवर जोर दिला होता. त्यामुळे गडकरी अधिक चर्चेत आले. 

1989मध्ये ते पहिल्यांदाच विधान परिषदेवर निवडून गेले होते. त्यापूर्वी 1983च्या निवडणुकीत त्यांना पराभवाला सामोरे जावं लागलं होतं. 20 वर्षाच्या विधानपरिषदेच्या काळात त्यांनी विधान परिषदेचे विरोधी पक्षनेते म्हणूनही काम पाहिलं होतं.