शिंदे-फडणवीस विरोधकांना अजून एक झटका देण्याच्या तयारीत? सर्व महापालिकेत 4 सदस्यांचा एक प्रभाग करा, सरनाईकांचं शिंदेंना पत्र
राज्यातील सर्व महापालिकांमध्ये चार सदस्यांचा एक प्रभाग करावा, असं पत्र आमदार प्रताप सरनाईक (Pratap Sarnaik) यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना लिहिलं आहे.
![शिंदे-फडणवीस विरोधकांना अजून एक झटका देण्याच्या तयारीत? सर्व महापालिकेत 4 सदस्यांचा एक प्रभाग करा, सरनाईकांचं शिंदेंना पत्र शिंदे-फडणवीस विरोधकांना अजून एक झटका देण्याच्या तयारीत? सर्व महापालिकेत 4 सदस्यांचा एक प्रभाग करा, सरनाईकांचं शिंदेंना पत्र](https://images.tv9marathi.com/wp-content/uploads/2022/07/22224916/Pratap-Sarnaik-1.jpg?w=1280)
मुंबई : राज्यातील आगामी महापालिका आणि स्थानिक स्वराज्य संस्थांच्या निवडणुका आता ओबीसी आरक्षणासह (OBC Reservation) होणार आहेत. सर्वोच्च न्यायालयाच्या (Supreme Court) निर्णयानंतर राज्यातील हा मोठा राजकीय प्रश्न निकाली निघालाय. अशावेळी नवनिर्वाचित शिंदे आणि फडणवीस सरकार काँग्रेस, राष्ट्रवादी आणि शिवसेनेला अजून एक झटका देण्याच्या तयारीत आहे. महाविकास आघाडी सरकारने मुंबई महापालिका वगळता अन्य महापालिकेत त्रिसदस्यीय प्रभाग पद्धती जाहीर केली होती. मात्र, राज्यातील सर्व महापालिकांमध्ये चार सदस्यांचा एक प्रभाग करावा, असं पत्र आमदार प्रताप सरनाईक (Pratap Sarnaik) यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना लिहिलं आहे.
माजी मुख्यमंत्री उद्धव ठाकरे यांच्या नेतृत्वातील महाविकास आघाडी सरकारने तीन सदस्यांची प्रभागरचना केली होती. आता सर्वोच्च न्यायालयाच्या निर्णयानंतर ओबीसी आरक्षणासह निवडणूक होणार आहे. त्यामुळे निवडणूक आयोगाला पुन्हा एकदा ओबीसी आरक्षणासह प्रभाग रचना करणं बंधनकारक असल्याचं सरनाईक यांचं मत आहे. मंत्रिमंडळाच्या पुढील बैठकीत राज्यातील सर्व महापालिकांमध्ये चार सदस्यांची प्रभाग रचना करण्याचा विषय मंजूर करुन, येत्या अधिवेशनात त्याची अंतिम मंजुरी घ्यावी अशी विनंती सरनाईक यांनी पत्राद्वारे केलीय. सेना-भाजप युती सरकारच्या काळात राज्यातील सर्व महापालिकेत चार नगरसेवकांचा एक प्रभाग होता आणि त्यानुसार निवडणुकाही पार पडल्या होत्या.
प्रताप सरनाईक यांचे पुत्र पुर्वेश सरनाईक यांची युवासेनेतून हकालपट्टी!
प्रताप सरनाईक यांचे पुत्र पुर्वेश सरनाईक यांची युवासेनेतून हकालपट्टी करण्यात आली आहे. आदित्य ठाकरे यांच्या आदेशानंतर ही कारवाई करण्यात आली. एक-एक करत आमदारांसह खासदारांनीही शिंदे गटाला आपला पाठिंबा जाहीर केला. त्यामुळे शिवसेनेत उभी पूट पडली. प्रताप सरनाईक यांनी आग्रहाने शिंदे गटाची बाजू लावून धरली त्यानंतर आता शिवसेनेकडून त्यांच्या मुलावर कारवाई करण्यात आली आहे. प्रताप सरनाईक यांचे पुत्र पुर्वेश सरनाईक यांची युवासेनेतून हकालपट्टी करण्यात आली आहे. सरनाईकांच्या बंडामुळे आता पुर्वेश यांच्यावरही कारवाई झाल्याचं दिसतंय. त्यांच्यासोबतच सहसचिव किरण साळी यांची युवासेनेतून हकालपट्टी करण्यात आली आहे. आता त्यांच्या जागी नव्या पदाधिकारऱ्यांची नियुक्ती केली जाणार आहे.