Vasai News : फुटबॉल खेळायला गेला तो परतलाच नाही, मैदानात जे घडलं त्याने सर्वच हादरले !
नेहमीप्रमाणे तरुण फुटबॉल खेळायला गेला. मात्र मैदानात खेळत असतानाच जे घडलं त्यानंतर साऱ्या गावावर शोककळा पसरली. कुटंबीयांना मानसिक धक्काच बसला.
वसई / 14 ऑगस्ट 2023 : वसईत एक हृदयद्रावक घटना उघडकीस आली आहे. फुटबॉल खेळता खेळता एका 27 वर्षीय तरुणाचा हृदयविकाराचा झटका आल्याने मृत्यू झाल्याची घटना वसईतील चुळणे गावात घडली. ईनोसंट चार्लस रिबेलो असे मयत तरुणाचे नाव आहे. ईनोसंटच्या दुर्दैवी मृत्यूमुळे त्याच्या कुटुंबीयांवर दुःखाचा डोंगर कोसळला आहे. हल्ली हृदयविकाराच्या घटनांमध्ये मोठ्या प्रमाणात वाढ झाली आहे. ईनोसंटचा शवविच्छेदन अहवाल आल्यानंतरच हृदयविकार येण्याचे कारण स्पष्ट होईल. चुळणे गावात शोककळा पसरली आहे.
खेळता खेळता मैदानात कोसळला, तो पुन्हा उठलाच नाही
ईनोसंट हा नियमित फटुबॉल खेळायचा. रविवारी सुट्टी असल्याने तो नेहमीप्रमाणे फुटबॉल खेळायला गावातील जिल्हा परिषद शाळेच्या मैदानात गेला होता. मात्र त्याला अस्वस्थ वाटू लगाले. म्हणून तो घरी परत आला. थोड्या वेळाने त्याला बरं वाटलं म्हणून फुटबॉल खेळायला गेला. त्यानंतर तो खेळता खेळता मैदानातच कोसळला. त्याला तात्काळ रुग्णालयात नेण्यात आले. मात्र डॉक्टरांनी उपचारादरम्यान त्याचा दुर्दैवी मृत्यू झाला.
