Shenaz Treasury: ‘इश्क विश्क’ फेम अभिनेत्रीला फेस ब्लाइंडनेसचा विकार; ओळखू शकत नाही लोकांचे चेहरे
आपल्याला प्रोसोपॅग्नोशियाचं (prosopagnosia) निदान झाल्याची माहिती तिने नुकतीच इंस्टाग्राम स्टोरीमधून दिली. प्रोसोपॅग्नोशिया हा एक विकार असून त्यात लोकांना इतरांचे चेहरे ओळखण्यास अडचणी येतात. इन्स्टा स्टोरीमध्ये मोठी पोस्ट लिहित शेनाझने याविषयीची माहिती दिली.
2003 मध्ये प्रदर्शित झालेल्या ‘इश्क विश्क’ (Ishq Vishk) या चित्रपटातून अभिनेत्री शेनाझ ट्रेजरी (Shenaz Treasury) प्रकाशझोतात आली. या चित्रपटात तिने शाहीद कपूर आणि अमृता अरोरा यांच्यासोबत काम केलं होतं. काही चित्रपटांनंतर शेनाझने बॉलिवूडपासून दूर राहणं पसंत केलं. परंतु सोशल मीडियावर तिचे असंख्य फॉलोअर्स आहेत. आपल्याला प्रोसोपॅग्नोशियाचं (prosopagnosia) निदान झाल्याची माहिती तिने नुकतीच इंस्टाग्राम स्टोरीमधून दिली. प्रोसोपॅग्नोशिया हा एक विकार असून त्यात लोकांना इतरांचे चेहरे ओळखण्यास अडचणी येतात. इन्स्टा स्टोरीमध्ये मोठी पोस्ट लिहित शेनाझने याविषयीची माहिती दिली.
शेनाझने लिहिलं, “मला प्रोसोपॅग्नोशिया 2 चं निदान झालं आहे. आता मला समजलं की मी कधीही लोकांचे चेहरे का ओळखू शकले नाही. हा एक विकार आहे. मला नेहमीच लाज वाटायची की मला चेहरे ओळखता येत नाहीत. मी आवाजावरून लोकांना ओळखायचे.” दुसर्‍या स्लाइडमध्ये तिने लिहिलं, “प्रोसोपॅग्नोशियाची लक्षणे: 1- तुम्ही जवळचा मित्र किंवा कुटुंबातील सदस्याला ओळखू शकत नाही, विशेषत: जेव्हा तुम्ही त्यांना भेटण्याची अपेक्षा करत नसता. होय, ती मीच आहे. ती व्यक्ती कोण आहे हे कळण्यासाठी मला एक मिनिट लागतो. काहीवेळा अगदी जवळचा मित्र, ज्याला मी काही काळापासून पाहिलेला नसेल तर त्यालाही मी ओळखू शकत नाही.”
पहा व्हिडीओ-
View this post on Instagram
ती पुढे म्हणाली, “तुम्हाला शेजारी, मित्र, सहकर्मचारी, ग्राहक, शाळेतले मित्र ओळखण्यात अडचण येते. तुमच्या ओळखीचे लोक तुम्ही त्यांना ओळखावं अशी अपेक्षा करतात. एखाद्याला ओळखण्यात अडचण झाल्यामुळे तुम्हाला अलिप्त असल्यासारखं वाटू शकतं. माझ्या अनेक मित्रमैत्रिणींनी आणि सहकार्‍यांनी नाराजी व्यक्त केली, कारण मी त्यांना लगेच ओळखू शकत नव्हते. चित्रपट पाहतानाही जर त्यातील दोन पात्रांची उंची, केशरचना, शरीराचा बांधा सारखा असेल तर मी त्यातला फरक लगेच ओळखू शकत नाही. म्हणून आता कृपया समजून घ्या की ही एक खरी समस्या आहे.”
इश्क विश्क व्यतिरिक्त शेनाझने उमर, आगे से राइट, रेडिओ, लव का द एंड, डेल्ही बेली यांसारख्या काही चित्रपटांमध्ये काम केलंय. ती सध्या ट्रॅव्हल ब्लॉगर म्हणून काम करत आहे. युट्यूबवर ती तिचे फिरण्याचे विविध व्हिडीओ पोस्ट करत असते.
