Thane Crime : तक्रार दिल्याच्या रागातून तरुणावर जीवघेणा हल्ला, घटना सीसीटीव्हीत कैद
अनधिकृत बांधकाम केल्याचा राग मनात धरुन तरुणासोबत भररस्त्यात भयंकर घटना घडली. या घटनेमुळे परिसरात खळबळ उडाली.
उल्हासनगर / 26 जुलै 2023 : अनधिकृत बांधकामाची तक्रार दिल्याच्या रागातून एका तरुणावर जीवघेणा हल्ला केल्याची धक्कदायक घटना उल्हासनगरमध्ये घडली आहे. या हल्ल्यात तरुण गंभीर जखमी झाला आहे. सर्व थरारक घटना सीसीटीव्हीत कैद झाली आहे. जखमी तरुणाला उपचारासाठी मध्यवर्ती रुग्णालयात दाखल करण्यात आले आहे. याप्रकरणी हिललाईन पोलीस ठाण्यात गुन्हा दाखल करण्याची प्रक्रिया सुरु आहे. पोलिसांनी तिन्ही आरोपींना ताब्यात घेतले आहे. मयूर भोई असे हल्ला झालेल्या तरुणाचे नाव आहे. तर सुनील साबळे, मोहन साबळे आणि जीवन साबळे अशी अटक आरोपींची नावे आहेत. पोलीस पुढील तपास करत आहेत.
अनधिकृत बांधकामाविरोधात तक्रार दिल्याच्या रागातून हल्ला
उल्हासनगर कँप 5 येथील इंदिरानगर परिसरात रस्त्यावरच आरोपींनी अनधिकृत बांधकाम केले होते. याबाबत येथील नागरिकांनी उल्हासनगर महापालिकेत तक्रार दाखल केली होती. याचा राग मनात धरुन आरोपींनी मयूर भोई या तरुणाला भररस्त्यात गाठले आणि लाकडी दांडक्याने मारहाण केली. या मारहाणीत मयूर गंभीर जखमी झाला. ही सर्व घटना सीसीटीव्हीत कैद झाली आहे. जखमी तरुणाला उपचारासाठी रुग्णालयात दाखल करण्यात आले आहे. या घटनेमुळे परिसरात काही काळ तणावाचे वातावरण होते.
