Mumbai Crime : हत्यारं घेऊन चोरी करायला गेले पण प्रयत्न फसला; थेट तुरूंगातच…
पोलिसांनी त्या तिघांकडून चाकू, लोखंड कापण्याचे कटर , स्क्रू-ड्रायव्हरसह दरोडा टाकण्यासाठी लागणारी हत्यारं जप्त केली आहेत.
![Mumbai Crime : हत्यारं घेऊन चोरी करायला गेले पण प्रयत्न फसला; थेट तुरूंगातच... Mumbai Crime : हत्यारं घेऊन चोरी करायला गेले पण प्रयत्न फसला; थेट तुरूंगातच...](https://images.tv9marathi.com/wp-content/uploads/2023/08/crime-news-17.jpg?w=1280)
मुंबई | 29 ऑगस्ट 2023 : धोकादायक शस्त्रांचा वापर करून दरोडा (robbery) टाकण्याच्या फुल्ल तयारीत असलेल्या तिघांना मालाड पोलिसांनी अटक केली आहे. नाझीर चौधरी, गोविंद उर्फ छोटू आणि लक्ष्मण निर्मल अशी संशयितांची नावे असल्याची माहिती समोर आली आहे. हे तिघेही धारदार शस्त्रांसह चोरी करण्याच्या तयारीत होते. मात्र पोलिसांनी त्यांचा प्लान उधळून लावत त्यांना अटक केली.
या ऑपरेशनदरम्यान पोलिसांनी त्यांच्याकडून चाकू, लोखंडी कटर, स्क्रू ड्रायव्हर, नायलॉनची दोरी आणि प्लास्टिकची टेप यासह दरोड्यासाठी वापरली जाणारी अनेक हत्यारेही जप्त केली. तसेच पोलिसांनी एक रिक्षाही ताब्यात घेतली आहे.
शनिवारी पहाटे 3 वाजून 30 मिनिटांच्या सुमारास ही घटना घडली. पहाटेच्या वेळी हे तिघे मालडमधील रामचंद्र गल्लीत संशयास्पद रितीने फिरताना आढळले. पोलिसांची चाहूल लागताच त्यांचे आणखी दोन साथीदार राहूल आणि सलमान या दोघांनी तिथून पोबारा केला. मात्र उरलेल्या तिघांना ताब्यात घेण्यात पोलिसांना यश मिळाले. आणि त्यांनी मोठ्या दरोड्याचा कट उधळून लावला. नंतर मिळालेल्या माहितीच्या आधारे पोलिसांनी शोध मोहिम जारी ठेवत इतर दोघांनाही ताब्यात घेत त्यांच्या मुसक्या आवळल्या.