Insurance Claim : विमा क्लेमसाठी कारच्या दोन्ही Key ठेवायच्या का सोबत, काय सांगतो नियम

नवी दिल्ली | 17 ऑगस्ट 2023 : देशातील अनेक शहरात कार चोरीच्या (Car Theft) घटना वाढल्या आहेत. मेट्रो शहरातच नाही तर ग्रामीण भागात पण कार चोरीच्या घटनांमध्ये वाढ झाली आहे. दुचाकी सोबत चारचाकी चोरीला जात असल्याने सर्वसामान्य चिंतेत आहे. ते विम्याचा आधार घेत आहे. त्यामुळे कार चोरीच्या प्रकरणात मोठे नुकसान त्यांना झेलावे लागत नाही. पण विम्याचा दावा (Insurance Claim) करताना आता आणखी एक अडचण उभी राहू शकते. जर तुमच्याकडे कारची केवळ एकच चावी, किल्ली असेल तर समस्या होऊ शकते. दावा मंजूर करताना अडचण येऊ शकते. याविषयीची चर्चा देशभरात सुरु आहे. याविषयी नियमात काही बदल झाला आहे का?

दिल्लीतील प्रकरण गाजले

दिल्लीतील असेच एक प्रकरण समोर आले आहे. येथील मयुर विहार भागात एक व्यक्ती मित्राकडे आली होती. केवळ एका तासात त्यांची कार चोरीला गेली. त्यांनी चार महिन्यांपूर्वीच ही ब्रीझा कार खरेदी केली होती. त्यांच्याकडे विमा होता. तसेच Return To Invoice आणि इतर कागदपत्रे होती. त्यामुळे त्यांना कारची सध्याची किंमत नुकसान भरपाई म्हणून मिळणे आवश्यक होते. त्यांनी पोलिसांमध्ये तक्रार दिली.

एका चावीने क्लेमच रिजेक्ट

विम्याचा दावा दाखल करण्यात आला. विमा कंपनीने विमा दावा दाखल करण्यापूर्वी कार मालकाकडे दोन चाव्या मागितल्या. कार खरेदी करताना या दोन्ही Keys कार कंपनी देत असते. पण मालकाकडून एक चाबी हरवली होती. त्याच्याकडे एकच चावी होती. विमा कंपनीने हा दावा फेटाळला. हरवलेल्या चावीच्या आधारे कार चोरीला गेली. हा मालकाचा निष्काळजीपणा असल्याचा दावा कंपनीने केला आणि दावा फेटाळला.

चावी नसेल तर काय करणार?

जर तुमच्या कारची अथवा बाईकची चावी हरवली असेल तर त्याची तक्रार पोलीस ठाण्यात करा. तसेच चावी रस्त्यावरील कोणत्याही डुप्लिकेट चावी तयार करणाऱ्याकडून तयार करु नका. त्याऐवजी कंपनीच्या शोरुमकडून तयार करुन घ्या. एफआयरची कॉपी, दुसरी चावी तयार करण्याच्या खर्चाची पावती सोबत असू द्या.

काय म्हणतात तज्ज्ञ

काही तज्ज्ञांच्या मते, विम्यात Key Replacement चे रायडर जरुर घ्या. महागड्या कारच्या ऑटोमॅटिक चावी अत्यंत महागडी असते. कारची चावी हरवल्यानंतर रायडर हा पर्याय निवडला असेल तर डुप्लिकेट चावी तयार करण्याचा अर्धा खर्च मिळतो. तसेच कार चोरीला गेली तर दुसऱ्या चावी संबंधीचा खटाटोप आणि त्याची बिलं सादर करता येतात. त्यामुळे कार चोरीवेळी विम्याचा दावा दाखल करताना मदत होते.