प्रोटीन ही शरीरासाठी खूप महत्त्वाची गोष्ट आहे. तुम्हाला तर माहीतच असेल की लोक प्रोटीन पावडर खातात. जिम मध्ये असे अनेक लोकं असतात जे एका प्रोटीन शेकर बॉटलमध्ये प्रोटीन टाकतात ते प्रोटीन हलवतात आणि मग ते पितात. आता प्रोटीन शरीराला महत्त्वाचं आहे का? तर होय. आहे.
मग लोकं असं पावडर मध्ये प्रोटीन का घेतात? कारण एकाच वेळी सगळ्या पद्धतीचे प्रोटीन आपल्याला मिळणं कठीण असतं. विशेषतः जेव्हा एखाद्याचा आहारच कमी असेल तेव्हा त्याला प्रोटीन पावडर खायचा सल्ला दिला जातो. बरेचदा हे प्रोटीन पाणी आणि दुधात मिक्स करून घेतलं जातं.
प्रोटिन्स आपले स्नायू मजबूत करतात, ते स्नायू दुरुस्त करतात. इतकंच काय तर आपली हाडे मजबूत ठेवण्यासाठी आणि आपली रोगप्रतिकारक शक्ती टिकवून ठेवण्यासाठी सुद्धा ते महत्त्वाची भूमिका बजावतात. अंडी, दूध, दही, मासे, डाळ, मांस आणि सोया असे पदार्थ प्रथिनेयुक्त असतात पण आता हे रोज खाणं शक्य नसतं. मग काही लोकांना सप्लिमेंट्स घ्यायचा सल्ला दिला जातो.
प्रोटीन गरजेचं असल्याने ते घेतलंच पाहिजे पण प्रोटीन पावडर जर घेत असाल तर ती घेतल्यानंतर व्यायाम करायचा सल्ला दिला जातो. ती घेऊन जर एका जागी बसलात तर तुम्ही लठ्ठ होऊ शकता. प्रोटीन पावडर घेतल्याचा फायदा तेव्हाच होऊ शकतो जेव्हा तुम्ही व्यायाम कराल.
प्रोटीन पावडर पाण्यात मिसळून घेणं कधीही चांगलं. सर्वात महत्त्वाचं म्हणजे आरोग्यतज्ञांच्या सल्ल्याशिवाय प्रोटीन शेक घेऊ नये. एका अभ्यासानुसार निकालात असं आढळून आलं की प्रोटीन पावडरने लुकड्या लोकांना आणि लठ्ठ लोकांना दोन्हींना फरक जाणवतो. फक्त अशा लोकांनी व्यायाम सुद्धा करायला हवा.