दोघेही लिव्ह इन मध्ये एकमेकांसोबत सुखात राहत होते, पण दोघांच्या नातेवाईकांची एन्ट्री झाली अन्…

क्षुल्लक कारणातून लिव्ह इन पार्टनरकडून महिलेची हत्या

Image Credit source: TV9

सिवनी : लिव्ह इन पार्टनरकडून हत्येच्या घटनांमध्ये दिवसेंदिवस वाढ होत आहे. मध्य प्रदेशातील सिवनी येथे अशीच एक घटना उघडकीस आली आहे. क्षुल्लक कारणातून लिव्ह इन पार्टनरनेच प्रेयसीची हत्या केली आहे. प्रेयसीची हत्या केल्यानंतर आरोपी फरार झाला. मात्र पोलिसांनी कसून शोध घेत आरोपीला अटक केली आहे. वैजयंती असे मयत महिलेचे नाव आहे, तर दिनेश असे आरोपीचे नाव आहे. याप्रकरणी महिलेच्या मुलाच्या फिर्यादीवरुन पोलिसांनी आरोपीविरोधात हत्येचा गुन्हा नोंद केला आहे. पोलिसांनी मृतदेह ताब्यात घेत शवविच्छेदनासाठी रुग्णालयात पाठवला. या घटनेमुळे परिसरात एकच खळबळ माजली आहे.

पतीच्या निधनानंतर महिला आरोपीसोबत लिव्ह इन मध्ये राहत होती

वैजयंती हिच्या पतीचे निधन झाले होते. तिला 16 वर्षाचा मुलगाही आहे. पतीच्या निधनानंतर काही दिवसांनी तिची दिनेशशी ओळख झाली होती. मग दोघांमध्ये मैत्री झाली आणि नंतर लिव्ह इन मध्ये राहण्याचा दोघांनी निर्णय घेतला. दिनेश हा अविवाहित होता. दोघांच्याही घरच्यांना त्यांचे लिव्ह इन रिलेशन मान्य होते. काही दिवस सर्व सुरळीत सुरु होते.

नातेवाईकांच्या येण्यावरुन दोघांमध्ये वाद व्हायचे

काही दिवसांनी वैजयंतीच्या नातेवाईकांचे घरी येणे-जाणे सुरु झाले. नातेवाईकांच्या वारंवार येणे-जाणे वाढल्याने दोघांमध्ये वाद होऊ लागले. हळूहळू हे वाद वाढू लागले. मंगळवारीही याच कारणातून त्यांच्यात वाद झाला आणि दिनेशने चाकूने वार करुन वैजयंतीची हत्या केली. त्यानंतर दिनेश तेथून पळून गेला. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेतला. महिलेच्या मुलाच्या जबानीवरुन पोलिसांनी दिनेशविरोधात कलम 302 नुसार गुन्हा दाखल केला. आरोपीला काही तासातच पोलिसांनी बेड्या ठोकल्या.