Asia Cup 2023 | आशिया कपसाठी श्रीलंका क्रिकेट संघ जाहीर, 4 खेळाडू दुखापतीमुळे ‘आऊट’

कोलंबो | आशिया कप 2023 साठी अखेर श्रीलंका क्रिकेट बोर्डाने स्पर्धेच्या काही तासांआधी 15 सदस्यीय संघाची घोषणा केली आहे. श्रीलंका क्रिकेट बोर्डाने ट्विट करत याबाबतची माहिती दिली आहे. या 15 सदस्यीय संघाच्या कर्णधारपदाची जबाबदारी ही दासुन शनाका याच्याकडे आहे. तर कुसल मेंडिस उपकर्णधार असणार आहे. तर वाईट बातमी अशी की टीममधून दुखापतीमुळे 4 खेळाडूंना बाहेर बसावं लागणार आहे. दुखापतीमुळे या चौघांची निवड करता आली नाही.

आशिया कपसाठी श्रीलंका क्रिकेट संघ जाहीर

दासुन शनाका याने आपल्याच नेतृत्वात गेल्या वर्षी 2022 मध्ये श्रीलंकेला आशिया कप जिंकून दिला होता. त्यात आता श्रीलंकेतच आशिया कपमधील 13 पैकी 9 सामने होणार आहेत. त्यामुळे श्रीलंकेला होम एडव्हानटेज असणार आहे. यामुळे आता दासुन या आशिया कपमध्ये कॅप्टन म्हणून कशी कामगिरी करतो, याकडेही श्रीलंका क्रिकेट बोर्ड आणि टीम मॅनेजमेंटचं लक्ष असणार आहे.

4 खेळाडूंची दुखापतीमुळे विकेट

एका बाजूला आशिया कपमधील 9 सामने श्रीलंकेत आहेत. तर दुसऱ्या बाजूला 4 खेळाडू हे दुखापतीच्या कचाट्यात सापडले आहेत. या चौघांमध्ये वानिंदु हसरंगा, दुष्मंथा चमीरा, दिलशान मदुशंका आणि लाहिरु कुमारा या चौघांचा समावेश आहे. या चौघांना दुखापतीमुळे टीममध्ये संधी देण्यात आली नाही. मात्र कुशल मेंडीस आणि धनंजय डी सिल्वा यांना कायम ठेवण्यात आलंय.

श्रीलंका बी ग्रुपमध्ये

दरम्यान आशिया कपमध्ये टीम इंडिया, पाकिस्तान, बांगलादेश, श्रीलंका, अफगाणिस्तान आणि नेपाळ असे 6 संघ खेळणार आहेत. टीम इंडिया, पाकिस्तान आणि नेपाळ ए ग्रुपमध्ये आहेत. तर श्रीलंका, अफगाणिस्तान आणि बांगलादेश बी ग्रुपमध्ये आहेत. त्यामुळे श्रीलंकेचा साखळी फेरीत बांगलादेश आणि अफगाणिस्तान यांच्याशी सामना होणार आहे.

आशिया कपसाठी श्रीलंका क्रिकेट टीम | दासुन शनाका (कॅप्टन), कुसल मेंडिस (उपकर्णधार), पाथुम निसांका, दिमुथ करुणारत्ने, कुसल जेनिथ परेरा, चरिथ असलंका, धनंजया डी सिल्वा, सदीरा समरविक्रमा, महेश थिक्षाना, दुनिथ वेललागे, मथीशा पाथिराना, कसून राजिथा, दुशन हेमंथा, बिनुरा फर्नांडो आणि प्रमोद मधुशन.