CWG 2022: Neeraj Chopra बाहेर गेल्यामुळे पाकिस्तानला लागली लॉटरी

Neeraj Chopra

मुंबई: कॉमनवेल्थ गेम्स स्पर्धा (CWG) सुरु होण्याआधी भारताला मोठा झटका बसला आहे. भालाफेकीत भारताचे हमखास पदकाचे आशास्थान असलेला नीरज चोप्रा (Neeraj Chopra) दुखापतीमुळे या स्पर्धेत खेळू शकणार नाहीय. वर्ल्ड चॅम्पियनशिप (World Championship) मध्ये रौप्यपदक मिळवणारा नीरज चोप्रा ग्रोइन इंजरीमुळे राष्ट्रकुल स्पर्धेला मुकणार आहे. नीरज चोप्रा बाहेर गेल्यामुळे पाकिस्तानला लॉटरी लागली आहे. कदाचित आता पाकिस्तानचा जॅवलिन थ्रोअर अर्शद नदीमला बर्मिंघम मध्ये पदक जिंकता येऊ शकते. वर्ल्ड चॅम्पियनशिप मध्येही नीरज चोप्रा बरोबर अर्शद नदीमचा सामना झाला होता. त्यावेळी नीरजने रौप्यपदक विजेती कामगिरी केली होती, तर अर्शद नदीमला पाचव्या स्थानावर समाधान मानावे लागले होते. याआधी टोक्यो ऑलिम्पिक स्पर्धेतही लढत झाली. त्यावेळी नीरजने सुवर्णपदाकाला गवसणी घातली, तर अर्शद नदीमला 5 व्या स्थानावर समाधान मानावे लागले.

स्वबळावर नाही, नशिबाने जिंकू शकतो पाकिस्तान

जेव्हा कधी मोठ्या स्टेजवर भारताच्या नीरज चोप्रा बरोबर पाकिस्तानच्या अर्शद नदीमचा सामना झालाय, प्रत्येकवेळी नीरज चोप्रा सरस ठरलाय. यावेळी पाकिस्तानी जॅवलिन थ्रोअरकडे मोठी संधी आहे. नीरज राष्ट्रकुल स्पर्धेतून बाहेर गेल्यामुळे पाकिस्तानला ही संधी आहे. नीरज चोप्राला वर्ल्ड चॅम्पियनशिप स्पर्धेदरम्यान ग्रोइन इंजरी झाली होती. त्यामुळे बर्मिंघम मध्ये स्पर्धेत सहभागी न होण्याचा निर्णय घेतला.

अर्शदलाही दुखापत

नीरज प्रमाणेच पाकिस्तानचा अर्शद नदीम सुद्धा गुडघे दुखापतीने ग्रस्त आहे. कदाचित कॉमनवेल्थ स्पर्धेनंतर तो गुडघ्यावर शस्त्रक्रिया करुन घेऊ शकतो. कॉमनवेल्थ मध्ये मेडल जिंकण्यासाठी अर्शद नदीमने दक्षिण आफ्रिकेत जाऊन प्रचंड तयारी केली आहे. पाकिस्तानात दिलेल्या एका मुलाखतीत त्याने हा खुलासा केला.