अजितदादांच्या सभेसाठी ‘त्या’ मंत्र्याने सत्तेचा पुरेपुर वापर केला, पण…; रोहित पवार यांचा उत्तरसभेवर निशाणा

मुंबई | 28 ऑगस्ट 2023 : राष्ट्रवादी अजित पवार गटाची काल बीडमध्ये सभा झाली. या सभेत अजित पवार यांच्यासह इतर नेत्यांनी धडाकेबाज भाषणं केली. या सभेवर राष्ट्रवादीचे कर्जत जामखेडचे आमदार रोहित पवार यांनी टीका केली आहे. या सभेची तुलना त्यांनी अजित पवारांच्या बारामतील सभेशी केली आहे. ट्विट करत रोहित पवार यांनी निशाणा साधला. अजित पवार यांच्या बीडमधील सभेसाठी एका मंत्र्याने सत्तेचा पुरेपुर वापर केला. पण महाराष्ट्रातील जनता हुशार आणि स्वाभिमानी आहे, हे पुन्हा एकदा स्पष्ट झालं, असं रोहित पवार म्हणाले.

काल सभेला गर्दी झाली पण जेव्हा पवार शरद पवारसाहेबांबद्दल वक्तव्य झाली. तेव्हा लोक तिथून निघू जाताना पाहायला मिळालं, असं रोहित पवार म्हणाले.

रोहित पवार यांचं ट्विट जसंच्या तसं

बीडमध्ये मोठं स्वागत झालं पण एका मंत्र्याने त्यासाठी सत्तेचा पुरेपूर वापर केला, हेही नजरेआड करता येणार नाही. या सभेत जेंव्हा आदरणीय पवार साहेबांच्या विरोधात एका मंत्र्याचे सूर निघायला लागले त्याला लोकांनीच विरोध केल्याने संबंधित मंत्र्याला दोन मिनिटांत आपलं भाषण गुंडाळावं लागलं. बाकी संपूर्ण सभेत जेंव्हा भाजपाची आरती गायली गेली तेंव्हा बारामतीप्रमाणेच स्वाभिमानी बीडकरांनीही एकही टाळी वाजवली नाही आणि खुर्च्याही रिकाम्या व्हायला लागल्या, यातच सर्व आलं…. कारण बारामती असो किंवा बीड… संपूर्ण महाराष्ट्रातील जनता हुशार आणि स्वाभिमानी आहे, हे पुन्हा एकदा स्पष्ट झालं.

मुख्यमंत्री एकनाथ शिंदे बैठकीसाठी आज गुजरातला गेले आहेत. त्यावर रोहित पवार यांनी प्रतिक्रिया दिली आहे. आजची परिस्थिती वेगळी झाली आहे. आधी महाराष्ट्रात नेते यायचे आदर्श घ्यायला. आज आपले मुख्यमंत्री गुजरातला गेले आहेत. महाराष्ट्र बघत आहे. राजकारण न करता आपण माणुसकीच्या हिताने पहिलं पाहिजे. गुजरातचे दोन विषय आहे. डायमंड मार्किट आणि आयएफएससी मार्केट. या संदर्भात जाऊन बघून यावं आणि चर्चा करावी, असं रोहित पवार म्हणाले.

रोहित पवार यांनी नवाब मलिक यांची भेट घेतली. याबाबतही रोहित पवार यांनी माहिती दिली. या भेटीत कोणतीही राजकीय इतर चर्चा झालेली नाही. मी फक्त त्यांच्या तब्येतीची विचारपूस केली. त्यांना काळजी घ्यायला सांगितलं, असं रोहित पवार म्हणाले.