Karan Johar: करण जोहरला धमकावून खंडणी मागण्याचा प्लॅन; लॉरेन्स बिश्नोई गँगच्या सदस्याचा खुलासा

Karan Johar

Image Credit source: Instagram

बॉलिवूडचा प्रसिद्ध निर्माता-दिग्दर्शक करण जोहरचं (Karan Johar) नाव हे खंडणीसाठी (extortion) लॉरेन्स बिश्नोईच्या (Lawrence Bishnoi) टोळीच्या यादीत असल्याचं टोळीचा सदस्य महाकाल याने चौकशीदरम्यान उघड केल्याचं पोलिसांनी सांगितलं. परंतु त्याच्या या दाव्याची अद्याप पडताळणी झाली नसल्याचंही पोलीस अधिकाऱ्यांनी स्पष्ट केलं. महाकाल हा पंजाबी गायक सिद्धू मूसवालाच्या हत्या प्रकरणातील संशयित शूटर संतोष जाधव याचा जवळचा सहकारी आहे आणि त्याला हत्येच्या कटाची चांगली माहिती होती, असं एका पोलीस अधिकाऱ्यानं सांगितलं. महाकाल सध्या एका गुन्ह्यासाठी पुणे ग्रामीण पोलिसांच्या ताब्यात असून दिल्ली पोलिसांचं स्पेशल सेल, पंजाब पोलीस आणि मुंबई क्राइम ब्रांचच्या पथकांनी त्याची चौकशी केली. मूसवाला हत्या आणि बॉलिवूड अभिनेता सलमान खानला मिळालेल्या धमकीच्या पत्रासंदर्भात त्याची चौकशी केली गेली.

चौकशीदरम्यान महाकालने मूसवाला हत्येच्या कटाबद्दल बरीच माहिती उघड केली आणि हत्येमध्ये संतोष जाधव आणि नागनाथ सूर्यवंशी यांचा सहभाग होता असं त्याने पोलिसांना सांगितलं. त्याने बिश्नोई टोळीच्या भविष्यातील प्लॅनिंगचीही माहिती दिली. या टोळीने करण जोहरला धमकावून त्याच्याकडून 5 कोटी रुपये उकळण्याची योजना आखली होती, असं त्याने सांगितलं.

इन्स्टा पोस्ट-

महाकालने पोलिसांना दिलेल्या माहितीनुसार, कॅनडास्थित गँगस्टर गोल्डी ब्रारचा भाऊ विक्रम ब्रार याने त्याच्याशी इन्स्टाग्राम आणि सिग्नल अॅप्सवर या योजनांबाबत चर्चा केली होती. अमली पदार्थांची तस्करी करणारी एक महिला आणि शीख समुदायाच्या पवित्र ग्रंथाची अपमान केल्याचा आरोप असलेले डॉक्टरदेखील त्यांच्या यादीत होते, असं अधिकाऱ्याने सांगितलं. मात्र त्याच्या या सर्व दाव्यांची पडताळणी तपास यंत्रणा करणार आहे. जाधव आणि त्याचा सहकारी नवनाथ सूर्यवंशी यांना पुणे ग्रामीण पोलिसांनी गुजरातमधील भुज इथून अटक केली. मे महिन्यात मूसवालाच्या हत्येनंतर निर्माण झालेल्या खळबळीचा फायदा घेण्याचा प्रयत्न बिश्नोई गँगने केला आणि बॉलिवूड सेलिब्रिटींना धमकावण्याचा निर्णय घेतला. सलमान खानला खंडणीसाठी धमकावणं हा विक्रम ब्रारने रचलेल्या या कटाचा एक भाग होता.

प्रसिद्धी मिळवणं आणि त्यासाठी फुशारक्या मारणं हा हेतू अशा दाव्यांमागे असू शकतो, असं पोलिसांचं म्हणणं आहे. पंजाब आणि इतर शेजारील राज्यांमध्ये हे खूपच सामान्य आहे. त्यांना (गुंडांना) त्यांची नावं हाय-प्रोफाइल प्रकरणांशी जोडायची असतात आणि म्हणूनच ते अशी नावं घेतात, असं पोलीस अधिका-याने सांगितलं.