Nagpur Crime : उधारीचे पैसे मागितले म्हणून हॉटेल मालकावर हल्ला, नागपुरात चाललंय काय?

उधारीचे पैसे मागितल्याने हॉटेल मालकावर हल्ला

Image Credit source: TV9

नागपूर / 26 ऑगस्ट 2023 : हॉटेल मालकाने उधारीचे पैसे मागितले म्हणून त्याच्यावर धारदार चाकूने हल्ला करण्यात आल्याची धक्कादायक घटना नागपूरमध्ये घडली आहे. या हल्ल्यात हॉटेल मालक गंभीर जखमी झाला आहे. जखमी हॉटेल मालकाला उपचारासाठी रुग्णालयात दाखल करण्यात आले आहे. नागपुरच्या गणेशपेठ परिसरात ही खळबळजनक घटना घडली आहे. ही सर्व सीसीटीव्ही कॅमेऱ्यात कैद झाली आहे. याप्रकरणी गणेशपेठ पोलीस ठाण्यात गुन्हा दाखल करण्यात आला असून, पोलिसांनी आरोपीला अटक केली आहे. ललित अग्नीहोत्री असे अटक आरोपीचे नाव आहे. भरबाजारात घडलेल्या या घटनेमुळे नागपुरात एकच खळबळ उडाली आहे. या घटनेमुळे व्यापाऱ्यांमध्ये भीतीचे वातावरण आहे.

काय आहे प्रकरण?

गणेशपेठ बसस्थानक परिसरात असलेल्या अंबिका हॉटेलमध्ये आरोपी ललित नियमित जेवायला यायचा. यामुळे पीडित हॉटेल मालक आणि आरोपी एकमेकांना ओळखायचे. आरोपी कधी पैसे द्यायचा, तर कधी उधारी ठेवायचा. ललितची उधारी वाढत चालली होती. यामुळे हॉटेल मालकाने त्याच्याकडे उधारीबाबत विचारणा केली. यामुळे ललित चिडला आणि त्याने हॉटेल मालकाला धमकी देत त्याच्या धारदार शस्त्राने हल्ला केला. या हल्ल्यात हॉटेल मालक गंभीररित्या जखमी झाला.

अचानक घडलेल्या या घटनेमुळे हॉटेलमधील कर्मचारी, ग्राहक सर्वांनाच धक्का बसला. घटनेनंतर आरोपी पळून गेला. जखी मालकाला तात्काळ रुग्णालयात उपचारासाठी दाखल करण्यात आले. घटनेची माहिती मिळताच गणेशपेठ पोलिसांनी घटनास्थळी धाव घेत पंचनामा करत तपास सुरु केला. पोलिसांनी सीसीटीव्हीच्या मदतीने आरोपीचा शोध घेत त्याला अटक केली आहे. गणेशपेठ बस स्थानक परिसरात अनेक हॉटेल्स आहेत. लोकांची वर्दळ सुद्धा त्या ठिकाणी मोठी असते. या घटनेनंतर मात्र परिसरात भीतीच वातावरण निर्माण झालं आहे.