दहा वर्षांचं प्रेम एका क्षणात संपलं, त्या दोघांमध्ये असं काय घडलं की प्रेयसीनेच…

नागपुरात कौटुंबिक वादातून पतीने पत्नीला संपवले

Image Credit source: TV9

फरीदाबाद : दोघांचं एकमेकांवर प्रेम होतं. दहा वर्ष दोघं सोबत राहिले. पण अचानक एक दिवस प्रियकराच्या हत्येची बातमी आली आणि सर्वांनाच धक्का बसला. प्रेयसीनेच प्रियकराची हत्या केली. हत्या केल्यानंतर प्रेयसी पळून गेली. पण पोलिसांनी कसून शोध घेत दुसऱ्याच दिवशी तिला अटक केली आहे. घटनेची माहिती मिळताच पोलिसांनी घटनास्थळी दाखल होत मृतदेह ताब्यात घेत शवविच्छेदनासाठी रुग्णालयात पाठवला. शवविच्छेदनानंतर मृतदेह नातेवाईकांकडे सोपवण्यात आला. भूप सिंह असे मयत प्रियकराचे नाव आहे. सिंहच्या भावाच्या फिर्यादीवरुन पोलिसांनी प्रेयसीविरोधात हत्येचा गुन्हा दाखल केला आहे. पोलीस प्रकरणाचा अधिक तपास करत आहेत.

दोघांमध्ये नेहमी वाद व्हायचा

भूप सिंह हा मूळचा उत्तर प्रदेशातील रहिवासी होता. तर त्याची प्रेयसी गंगा उत्तराखंडची रहिवासी आहे. भूप सिंह पेशाने मिस्त्री होता. सिंहच्या पत्नीचे निधन झाले होते. यानंतर त्याची गंगाशी ओळख झाली. मग दोघांमध्ये प्रेमसंबंध जुळले. दोघे आधी उत्तराखंडमधील रुद्रपूरमध्ये राहत होते. मार्च 2023 पासून फरीदाबादला आले. दोघांमध्ये नेहमी वाद व्हायचा.

रोजच्या त्रासाला कंटाळून प्रियकराची हत्या

भूपला दारुचे व्यसन होते. नशेत तो गंगाला मारहाणही करायचा. एकदा जीवे मारण्याचा प्रयत्न केला होता, असे गंगाने पोलीस चौकशीत सांगितले. रोजच्या वादाला आणि मारहाणीला कंटाळून गंगाने भूपला कायमचे संपवले. रविवारी तो नशेत असताना गंगाने त्याची हत्या केली. घटनेनंतर गंगा तेथून पळून गेली. पण अखेर पोलिसांनी तिला पकडलेच. पोलिसांनी गंगा अटक केली आहे. पोलीस पुढील तपास करत आहेत.