Navi Mumbai Crime : बहिणीचं प्रेम भावाला मान्य नव्हतं, मग भररस्त्यातच बहिणीच्या प्रियकराला तुडवलं !
बहिणीचे प्रेमसंबंध भावाला मान्य नव्हते. मग भावाने भररस्त्यात जे केले त्याने परिसरात एकच खळबळ उडाली. भररस्त्यातील राडा सोशल मीडियावर व्हायरल झाला आहे.
नवी मुंबई / 16 ऑगस्ट 2023 : नात्यातील बहिणीशी प्रेमसंबंध असल्याच्या रागातून वाशीतील रघुलीला मॉलमध्ये एका तरुणावर हल्ला केल्याची घटना उघडकीस आली आहे. या मारहाणीचा व्हिडिओ सोशल मीडियावर व्हायरल झाला आहे. सोमवारी मध्यरात्री ही घटना घडली. शुभम हाजीज सरवैया असे मारहाण झालेल्या तरुणाचे नाव आहे. घटनेची माहिती मिळताच पोलीस तात्काळ घटनास्थळी हजर झाले, अन्यथा मोठा अनर्थ घडला असता. पोलिसांनी दोघांना ताब्यात घेतलं असून, त्यांच्यावर गुन्हा दाखल करण्यात आला आहे. हसन सिद्धीकी आणि युसूफ शाह अशी अटक केलेल्या आरोपींची नावे आहेत. जखमींना मुंबईतील जे जे रुग्णालयात उपचारासाठी दाखल करण्यात आलं आहे.
वाशीतील रघुलीला मॉलबाहेरच राडा
शुभम हा सोमवारी मध्यरात्री मित्राचा वाढदिवस साजरा करायला रघुलीला मॉलमध्ये गेला होता. यावेळी आरोपींनी त्याला मॉलबाहेर गाठला. शुभमवर हल्ला होताना पाहून त्याचा मित्र त्याला वाचवण्यासाठी पुढे आला. आरोपींनी त्यालाही मारहाण केली. बघ्यांनी घटनेचा व्हिडिओ मोबाईलमध्ये कैद केला होता. हा व्हिडिओ आता सोशल मीडियावर व्हायरल झाला आहे.
बहिणीसोबत प्रेमसंबंध असल्याच्या रागातून मारहाणीची घटना
घटनेची माहिती मिळताच वाशी पोलीस घटनास्थळी दाखल झाले. पोलिसांनी आरोपींना ताब्यात घेतले. आरोपींकडून चाकू आणि गुन्ह्यात वापरलेली कारही जप्त करण्यात आली आहे. आरोपीच्या नात्यातील बहिणीसोबत शुभमचे प्रेमसंबंध होते. याच रागातून त्याने शुभमवर हल्ला केल्याचे पोलीस चौकशीत सांगितले.
खुलेआम घडलेल्या या घटनेमुळे परिसरात एकच खळबळ उडाली. भररस्त्यात चाकू काढल्याने कायदा आणि सुव्यवस्थेचा प्रश्न निर्माण झाला आहे.
