सून घरी काम करत नव्हती, सासूला संताप अनावर झाला अन् घडू नये ते घडलं !

कौटुंबिक वादातून सासूने सुनेला संपवले

अमरोहा : उत्तर प्रदेशात एक खळबळजनक घटना उघडकीस आली आहे. सून घरी काम करत नसल्याने आणि हुंड्यासाठी सासूने सूनेची गोळी घालून हत्या केल्याची घटना उत्तर प्रदेशातील अमरोहा जिल्ह्यात घडली आहे. याप्रकरणी पती, सासू आणि सासरा तिघांविरोधात हत्या आणि हुंडा प्रकरणी गुन्हा दाखल करण्यात आला आहे. पोलिसांनी तिनही आरोपींना अटक केली आहे. कोमल असे मयत विवाहितेचे नाव आहे. पोलिसांपासून वाचण्यासाठी सुरवातीला आरोपी कुटुंबीयांनी पोलिसांची दिशाभूल करण्याचा प्रयत्न केला. मात्र पोलिसी खाक्या दाखवताच आरोपींनी गुन्हा कबूल केला. पोलीस पुढील तपास करत आहेत.

काय घडलं नेमकं?

मयत कोमलच्या माहेरची परिस्थिती श्रीमंत होती. यामुळे ती सासरी घरकाम करत नव्हती. तसेच सासू नेहमी तिच्याकडे हुंड्याची मागणी करायची. यामुळे सासू-सुनेमध्ये नेहमी भांडण व्हायचे. याच भांडणातून सासूने सुनेच्या डोक्यात गोळी घालून तिची हत्या केली. यानंतर चलाखीने बंदुक नाल्यात फेकली. घरी चोरीच्या दरम्यान ही हत्या झाल्याचे तिने नातेवाईकांना सांगितले.

विवाहितेच्या आईच्या तक्रारीवरुन गुन्हा दाखल

दरम्यान, पोलिसांना घटनेची माहिती मिळाली. पोलिसांनी घटनास्थळी दाखल होत विवाहितेला रुग्णालयात नेले. मात्र तिचा मृत्यू झाला होता. कोमलच्या आईने तिच्या सासूवर हुंड्यासाठी छळ केल्याचा आरोप करत तक्रार दाखल केली. यानंतर पोलिसांनी शेजारी आणि नातेवाईकांची चौकशी केली असता ही सत्य समोर आले. तसेच परिसरातील दुकानदारांनी कोमलच्या सासूला नाल्यात काहीतरी फेकताना पाहिले होते. त्यांनी पोलिसांना याबाबत सांगितले. यानंतर पोलिसांनी कोमलच्या सासूला ताब्यात घेत तिची कसून चौकशी केली असता तिने सर्व हकीकत सांगितली.