Mumbai Crime : बँक ऑफ इंडियातून पुन्हा दागिने गायब, महिला ग्राहकाचे लाखोंचे दागिने गेले कुठे?
बँक ऑफ इंडियामध्ये सध्या धक्कादायक प्रकार उघडकीस येत आहेत. बँकेच्या लॉकरमधून ग्राहकांचे दागिने चोरीला जात असल्याने एकच खळबळ उडाली आहे.
मुंबई / 21 ऑगस्ट 2023 : महिनाभरापूर्वीची दागिने चोरीची घटना ताजी असतानाच आता बँक ऑफ इंडियाच्या लॉकरमधून पुन्हा दागिने चोरीला गेले आहेत. अंधेरी येथील रहिवासी असलेल्या महिलेचे 12 लाखांचे दागिने बँकेच्या लॉकरमधून गायब झाले आहेत. याप्रकरणी गावदेवी पोलीस ठाण्यात तक्रार दाखल करण्यात आली आहे. पोलीस या प्रकरणाचा तपास करत आहेत. महिनाभरापूर्वी बँक ऑफ इंडियाच्या वाळकेश्वर शाखेतील दोन लॉकरमधून सोने चोरी गेले होते. याप्रकरणी लॉकरचा रखवालदार असलेल्या बँक कर्मचाऱ्याला अटक करण्यात आली होती. मात्र बँक ऑफ इंडियात सतत उघडकीस येणाऱ्या या घटनांमुळे ग्राहकांच्या वस्तूच्या सुरक्षेचा प्रश्न ऐरणीवर आला आहे.
काय आहे प्रकरण?
अंधेरी येथील रहिवासी असलेल्या मिला संपत या महिलेचे महालक्ष्मीच्या भुलाभाई देसाई रोडवर असलेल्या बँक ऑफ इंडियाच्या शाखेत लॉकर आहे. या लॉकरमध्ये संपत यांनी सोन्याचे, हिऱ्याचे दागिने आणि मौल्यवान घड्याळे ठेवली होती. वर्षभरातून एकदा त्या लॉकर तपासत असत. त्याप्रमाणे जानेवारी 2020 मध्ये संपत यांनी शेवटचे लॉकरमध्ये दागिने पाहिले. त्यानंतर लॉकडाऊनमुळे, त्यांना 2021 मध्ये लॉकर पाहता आले नाही.
महिलेने जून 2022 मध्ये बँकेला भेट दिली. मात्र लॉकर रुममध्ये प्रवेश करताच रुममधील वीजपुरवठा खंडित झाला. त्यामुळे त्यांना लॉकर न तपासताच परतावे लागले. यानंतर ऑगस्ट 2022 मध्ये, संपत यांना एक व्हॉट्सअॅप मॅसेज आला. यात त्यांना कळवण्यात आले की, बँक बदलत आहे आणि त्यांना त्यांचे बँक लॉकर त्वरीत रिकामे करायचे आहे. या मॅसेजनंतर त्यांनी लॉकर तपासण्यासाठी बँकेला भेट दिली, तेव्हाच सोन्याचे आणि हिऱ्याचे दागिने गायब असल्याचे आढळून आले.
हरवलेल्या दागिन्यांबाब संपत यांनी बँक मॅनेजरला कळवले, मात्र त्यांनी लक्ष दिले नाही. बँकेच्या अधिकाऱ्यांकडून प्रतिसाद मिळाला नाही. अखेर त्यांनी गावदेवी पोलीस ठाण्यात तक्रार दाखल केली. संपत यांच्या तक्रारीनंतर, गावदेवी पोलिसांनी तपास सुरू केला आणि आयपीसीच्या कलम 380 अंतर्गत एफआयआर नोंदवला.
