Subhedar | ‘गदर 2’, ‘ड्रीम गर्ल 2’ला विसरा, ‘सुभेदार’ने अवघ्या दोन दिवसांत कमावले कोट्यवधी रुपये

Subhedar

Image Credit source: Instagram

मुंबई | 28 ऑगस्ट 2023 : ‘फर्जंद’, ‘फत्तेशिकस्त’, ‘पावनखिंड’ आणि ‘शेर शिवराज’ यांसारख्या दमदार चित्रपटांनंतर दिग्पाल लांजेकर यांचा ‘सुभेदार’ नुकताच प्रेक्षकांच्या भेटीला आला. 25 ऑगस्ट रोजी प्रदर्शित झालेल्या या चित्रपटाने अवघ्या दोन दिवसांत कोट्यवधी रुपयांची कमाई केली आहे. एकीकडे बॉक्स ऑफिसवर ‘गदर 2’ आणि ‘ड्रीम गर्ल 2’ यांसारख्या बॉलिवूड चित्रपटांची चर्चा असतानाच ‘सुभेदार’ने प्रेक्षकांची गर्दी आपल्याकडे खेचली आहे. या चित्रपटातून सुभेदार तान्हाजी मालुसरे यांच्या पराक्रमाचा सुवर्ण इतिहास रुपेरी पडद्यावर दाखवण्यात आला आहे.

‘आधी लगीन कोंढाण्याचं आन मग माझ्या रायबाचं…’ असं म्हणत अखेरच्या श्वासापर्यंत लढणाऱ्या सुभेदार तान्हाजी मालुसरे हे शिवछत्रपतींच्या योद्ध्यांपैकी एक महत्त्वाचं नाव आहे. दिग्पाल लांजेकर लिखित आणि दिग्दर्शित या चित्रपटात कलाकारांची मोठी फौजच आहे. या चित्रपटाने पहिल्याच दिवशी 1.05 कोटी रुपयांचा गल्ला जमवला. तर दुसऱ्या दिवसाच्या कमाईत 60 टक्क्यांची वाढ पहायला मिळाली. ‘सुभेदार’ने शनिवारी 1.75 कोटी रुपये कमावले. ‘गदर 2’ आणि ‘ड्रीम गर्ल 2’ यांसारख्या चित्रपटांकडून जबरदस्त टक्कर मिळत असतानाही ‘सुभेदार’ हा चित्रपट चांगली कमाई करतोय.

‘सुभेदार’ची दोन दिवसांची कमाई-

शुक्रवार- 1.05 कोटी रुपये
शनिवार- 1.75 कोटी रुपये
एकूण- 2.80 कोटी रुपये

अखेरच्या श्वासापर्यंत लढणाऱ्या सुभेदार नरवीर तान्हाजी मालुसरे हे शिवछत्रपतींच्या योद्ध्यांपैकी महत्त्वाचे नाव! तान्हाजीरावांच्या नावाशिवाय शिवचरित्र पूर्णच होऊ शकत नाही. पण तान्हाजीराव म्हणजे केवळ सिंहगडाची लढाई नव्हे, तर छत्रपतींच्या स्वराज्याची पायाभरणी करणारे आघाडीचे शिलेदार होते. ‘सुभेदार‘ हे मुलकी आणि लष्करी दोन्ही प्रकारचे महत्त्वाचे पद. या चित्रपटातून त्यांच्या अतुलनीय शौर्या बरोबरच त्यांच्या प्रशासकीय पैलूंवर प्रकाश टाकण्यात आला आहे.

‘सुभेदार’मध्ये अभिनेते अजय पूरकर यांनी तान्हाजी मालुसरेंची मुख्य भूमिका साकारली आहे. याशिवाय चित्रपटात स्मिता शेवाळे, चिन्मय मांडलेकर, मृणाल कुलकर्णी, शिवानी रांगोळे, समीर धर्माधिकारी, मृण्मयी देशपांडे, आस्ताद काळे यांच्या महत्त्वपूर्ण भूमिका आहेत.

‘सुभेदार’ने अजय देवगणच्या ‘तान्हाजी : द अनसंग वॉरियर’ला टाकलं मागे

सुभेदार या चित्रपटाने IMDb रेटिंगच्या शर्यतीत अजय देवगणच्या ‘तान्हाजी : द अनसंग वॉरियर’ला मागे टाकलं आहे. अजय देवगणच्या चित्रपटाला 7.5 IMDb रेटिंग आहे. तर ‘सुभेदार’ला 9.7 रेटिंग मिळाली आहे. अजयचा ‘तान्हाजी’ हा चित्रपटसुद्धा तान्हाजी मालुसरे यांच्यावर आधारित होता. ओम राऊत दिग्दर्शित हा चित्रपट 2020 मध्ये प्रदर्शित झाला होता.