Pune Crime : मित्राच्या मोटरसायकलवरुन आला, पुलावर गेला अन् काही क्षणात…, तरुणासोबत नेमकं काय घडलं?

पुण्यात जलाशयात तरुणाचा मृतदेह आढळला

Image Credit source: TV9

पुणे / 19 जुलै 2023 : नेहमीप्रमाणे घरुन कामावर गेलेला तरुण घरी परतलाच नाही. यानंतर दुसऱ्या दिवशी जलाशयात त्याचा मृतदेह आढळून आला. यानंतर तालुक्यात एकच खळबळ उडाली आहे. आकाश पांडुरंग लष्करे असे 25 वर्षीय मयत तरुणाचे नाव आहे. जुन्नर तालुक्यातील ओझर येथे येडगाव जलाशयामध्ये आकाशचा मृतदेह आढळून आला आहे. आकाशसोबत नेमंक काय घडलं हे अद्याप कळू शकले नाही. याप्रकरणी ओतूर पोलिसात नोंद करण्यात आली आहे. ओतूर पोलीस अधिक तपास करत आहेत. आकाशच्या अचानक मृत्यूमुळे कुटुंबीयांवर दुःखाचा डोंगर कोसळला आहे. आकशने स्वतःहून जीवन संपवले की घातपात झाला याबाबत पोलीस तपास सुरु आहे.

बाईक पुलाजवळ होती तर मृतदेह जलाशयात

जुन्नर तालुक्यातील धनगरवाडी येथे आकाश हा आपल्या आईसोबत राहत होता. आकाशच्या वडिलांचे निधन झाले होते. तर बहिण विवाहित आहे. आकाश एका किराणा दुकानात मार्केटिंगचे काम करत होता. काल आकाश मित्राची बाईक घेऊन घरुन गेला. यानंतर आकाशची बाईक ओझर पुलाजवळ आढळली. तर आकाशचा मृतदेह जलाशयात आढळला. घटनेची माहिती मिळताच धनगरवडीचे सरपंच महेश शेळके, उपसरपंच राजेंद्र शेळके, मयूर शेळके, नामदेव पाटोळे, इंद्रजित शेळके, सुभाष दळवी यांनी त्वरित घटनास्थळी धाव घेत पाण्यामधून आकाशचा मृतदेह बाहेर काढला.

तपासाअंती आत्महत्या की घातपात स्पष्ट होईल

आकाश हा कुटुंबातील एकुलता एक मुलगा होता. आकाशच्या जाण्यामुळे परिसरामध्ये शोककळा पसरली आहे. आकाशने आत्महत्या केल्याचे बोलले जात आहे. मात्र आकाशवर कोणतेही कर्ज नव्हते किंवा त्याचा कुणासोबतही वाद नव्हता. मग आकाशने जर खरंच आत्महत्या केली असेल तर यामागे काय कारण असेल याचा पोलीस तपास करत आहेत. तपासाअंती आकाशने नक्की आत्महत्या केली की त्याच्यासोबत घातपात झाला, हे स्पष्ट होईल.