नागपुरात दीड महिन्यात शरद पवार – नितीन गडकरी यांची दुसरी भेट; ४० मिनिटांच्या भेटीत या विषयांवर झाली चर्चा
चर्चेचा विषय ऊसशेती, शेतकरी आणि साखर कारखानदारी असला, तरी राजकारणातले दोन दिग्गज नेते भेटल्यावर राजकीय चर्चा तर होणारचं. दोन्ही नेत्यांमध्ये आज जवळपास ४० मिनिटे चर्चा झालीय.
नागपूर : राष्ट्रवादी काँग्रेसचे अध्यक्ष शरद पवार यांनी आज केंद्रीय मंत्री नितीन गडकरी यांची भेट घेतली. नागपुरात नितीन गडकरींच्या घरी दोन्ही नेत्यांमध्ये ही भेट झाली. गेल्या दीड महिन्यात नागपुरात शरद पवार आणि नितीन गडकरी यांची ही दुसरी भेट आहे. या भेटीत दोन्ही नेत्यांमध्ये ऊसशेती, साखर कारखानदारी आणि शेतकरी या विषयावर चर्चा झाल्याची माहिती आहे. पण या दोन्ही नेत्यांच्या भेटीचा राजकीय अर्थही काढला जातोय.
राष्ट्रवादी काँग्रेसचे अध्यक्ष शरद पवार दीड महिन्यात दुसऱ्यांना नागपूरच्या दौऱ्यावर आले. या दोन्ही दौऱ्यात शरद पवार यांनी केंद्रीय मंत्री नितीन गडकरी यांची भेट घेतली. आज शरद पवार नितीन गडकरी यांच्या घरी गेले. दोन्ही नेत्यांमध्ये जवळपास ४० मिनिटे चर्चा झाली.
४० मिनिटे झाली दोन मोठ्या नेत्यांमध्ये चर्चा
चर्चेचा विषय ऊसशेती, शेतकरी आणि साखर कारखानदारी असला, तरी राजकारणातले दोन दिग्गज नेते भेटल्यावर राजकीय चर्चा तर होणारचं. दोन्ही नेत्यांमध्ये आज जवळपास ४० मिनिटे चर्चा झालीय. यापूर्वी १२ फेब्रुवारीला शरद पवार नागपूर आणि वर्ध्याच्या दौऱ्यावर होते. त्यावेळीही परत जाताना विमानतळावर शरद पवार आणि नितीन गडकरी यांची भेट झाली.
साखर कारखानदारीबद्दल कामाचे कौतुक
पंतप्रधान नरेंद्र मोदींपासून तर उपमुख्यमंत्री देवेंद्र फडणवीस यांच्यापर्यंत, शरद पवार भाजपच्या अनेक नेत्यांवर टीका करतात. पण असं असलं तरीही केंद्रीय मंत्री नितीन गडकरी यांचं कौतुक करण्याची एकही संधी शरद पवार सोडत नाही. नितीन गडकरी यांनी विदर्भात ऊसशेती आणि साखर कारखानदारीबाबत केलेल्या कामाचं शरद पवार नेहमी कौतुक करतात.
त्यांच्या इतर कामांचही ते कौतुक करतात. त्यामुळे या दोन्ही नेत्यांमध्ये दीड महिन्यातल्या आजच्या दुसऱ्या भेटीवरून राजकीय चर्चा सुरू झाली. देशाच्या राजकारण शरद पवार एकीकडे मोदी सरकार विरोधात विरोधकांना एकत्र आणण्याचा प्रयत्न करत आहेत. त्यासाठी दिल्लीत बैठकाही घेत आहेत. तर दुसरीकडे मोदी सरकारचे वरिष्ठ केंद्रीय मंत्री नितीन गडकरी यांचं कौतुक आणि भेटीगाठींचेही सत्र सुरु आहे.
भेटीला राजकीय महत्त्व
शरद पवार यांचे राजकारण अवघ्या देशाला माहीत आहेत. ते राजकारणात सर्व पर्याय खुले ठेवत असल्याचं जाणकार सांगतात. २०१४ च्या विधानसभा निवडणुकीच्या निकालानंतर राष्ट्रवादी काँग्रेसने न मागता भाजपला पाठिंबा दिला होता. २०१९ लाही फडणवीस सोडून इतर कुणीही चालेल असा प्रस्ताव दिल्याची चर्चा होती. त्यामुळे आज शरद पवार आणि नितीन गडकरी यांच्या भेटीत शेती विषयावर चर्चा झाली असली, तरिही या भेटीला राजकीय महत्त्वही मोठं आहे.
