मंदिरात जातो सांगून घरुन गेला, मात्र पुन्हा परतलाच नाही, मग थेट…

नाशिकमध्ये अज्ञात कारणातून तरुणाने जीवन संपवले

Image Credit source: TV9

चैतन्य गायकवाड, TV9 मराठी, नाशिक : अज्ञात कारणातून तरुण अभियंत्याने स्वतःवर गोळी झाडून जीवन संपवल्याची घटना नाशिकमध्ये घडली आहे. या घटनेमुळे एकच खळबळ माजली आहे. संदीप नाना सहाणे असे मयत अभियंत्याचे नाव आहे. संदीपचे एक वर्षापूर्वीच लग्न झाले होते. संदीप एमआयडीसीत कामाला होता. तर पत्नीही पुण्यातील एका कंपनीत कामाला होती. मात्र ती घरुनच काम करायची. दरम्यान, संदीपने गावठी कुठून आणला?, त्याने टोकाचे पाऊल का उचलले याबाबत पोलीस अधिक तपास करत आहेत. या घटनेमुळे परिसरात एकच खळबळ उडाली आहे.

मंदिरात जातो सांगत घरातून गेला

नाशिकरोड जवळील पळसे येथील संदीप सहाणे हा बुधवारी सकाळी महादेव मंदिरात दर्शन घेऊन येतो, असे पत्नीला सांगून गेला. मात्र खूप वेळ झाला तरी तो परतलाच नाही. त्याची पत्नी सतत त्याला फोन करत होती, मात्र तो प्रतिसाद देत नव्हता. तिने जवळच राहणाऱ्या नातेवाईकाला बोलावले आणि दोघेही संदीपला शोधायला गेले.

घरी परतला नाही म्हणून पत्नीला पहायला गेली तर…

संदीप पत्नी त्याच्या नातेवाईकासह मंदिराजवळ पोहचली असता तिथे त्याची बाईक दिसली. त्यांनी आजूबाजूला शोध घेतला असता संदीप रक्ताच्या थारोळ्यात पडलेला दिसला. पोलिसांना घटनेची माहिती दिली असता पोलिसांनी मृतदेह ताब्यात घेत शवविच्छेदनासाठी रुग्णालयात पाठवला.

दरम्यान संदीपने जीवन का संपवले याबाबत माहिती मिळाली नाही. मात्र प्रेमभंगातून टोकाचे पाऊल उचलल्याचे बोलले जात आहे. संदीपचे एका मुलीसोबत प्रेमसंबंध होते. मात्र दोघांचा वेगवेगळ्या ठिकाणी विवाह झाला. यामुळे तो अस्वस्थ होता. यातून त्याने जीवन संपवल्याची माहिती मिळत आहे. याबाबत सत्य बाबींचा पोलीस तपास करत आहेत.